सामाजिक सञ्जालमा बिनादर्ता व्यापार गरे कारबाही गर्ने कानुन ल्याइँदै


[ss_social_share]
लेखक : admin      १० महिना अगाडि मा प्रकाशित     
सामाजिक सञ्जालमा बिनादर्ता व्यापार गरे कारबाही गर्ने कानुन ल्याइँदै
विद्युतीय व्यापार व्यवस्थापनको प्रस्तावित विधेयकमा फेसबुक, टिकटक, इन्स्टाग्रामजस्ता सामाजिकसञ्जालमार्फत व्यक्तिगत तहमा बिनादर्ता वस्तु तथा सेवा खरिदबिक्री गर्न नपाइने व्यवस्था
काठमाडौँ — यदि तपाईं आफ्नो मोटरसाइकल बेच्ने सोचमा हुनुभयो । त्यसका लागि फेसबुक मार्केटप्लेसमा मोटरसाइकलको फोटोसहितको विवरण राख्नुभयो । कसैले किन्न रुचि देखायो र आपसी सहमतिमा खरिदबिक्री भयो । तर, हाल छलफलका क्रममा रहेको ई–कमर्ससम्बन्धीको विधेयक जस्तातस्तै पारित भई कानुन बनेमा सामाजिक सञ्जालबाट गरिने यस्ता खरिदबिक्री अवैध ठहरिनेछन्, तपाईंमाथि कारबाही हुन सक्छ । हाल फेसबुकलगायतका सामाजिक सञ्जालको प्रयोग गरी यस्तो खरिदबिक्री र लेनदेन गर्नेको संख्या भने धेरै छ ।
‘विद्युतीय व्यापारका सम्बन्धमा व्यवस्था गर्न बनेको विधेयक २०८०’ को दफा ३, ४ र ५ मा विद्युतीय व्यापार सञ्चालन गर्न प्रचलित कानुनबमोजिम दर्ता हुनुपर्ने, वेबसाइट, एपजस्ता आफ्नै विद्युतीय प्लाटफर्म बनाउनुपर्ने र उक्त प्लाटफर्मलाई सरकारले स्थापना गर्ने विद्युतीय व्यापार पोर्टलमा सूचीकरण गर्नुपर्ने व्यवस्था छ । त्यसो नगरे १० हजारदेखि ५० हजार रुपैयाँसम्म जरिवाना लाग्ने विधेयकमा उल्लेख छ । उद्यमी व्यवसायीहरूले सामाजिक सञ्जाललाई पनि विद्युतीय प्लाटफर्मअन्तर्गत राख्न माग गर्दै आएका छन् । तर, सरकारले फेसबुक मार्केटप्लेसलगायत सञ्जालहरू व्यापार गर्ने प्लाटफर्म नभएको भन्दै त्यसलाई समेट्न खोजेको छैन ।