कक्षा १२ को नतिजा : अंग्रेजी विषयमा किन देखियो कमजोर ?


[ss_social_share]
लेखक : admin      ४ महिना अगाडि मा प्रकाशित     
कक्षा १२ को नतिजा : अंग्रेजी विषयमा किन देखियो कमजोर ?

काठमाडौँ । कक्षा १२ मा अंग्रेजी विषयमा सबैभन्दा कमजोर नतिजा देखियो । राष्ट्रिय परीक्षा बोर्डले सार्वजनिक गरेको नतिजाअनुसार सबैभन्दा बढी अंग्रेजी विषयमा फेल भएको देखियो ।  नन ग्रेडेड (एनजी) आएका विद्यार्थीहरूमध्ये सबैभन्दा बढी अंग्रेजी विषयमा रहेका छन् ।

अंग्रेजीमा मात्रै १ लाख ९ हजार ५२७ विद्यार्थीको एनजी आएको छ । यो एनजी आउने विद्यार्थीको ५९.८७ प्रतिशत र जम्मा परीक्षार्थीको २४.४० प्रतिशत हुन आउँछ ।  यो वर्षको परीक्षामा नियमित, आंशिक, ग्रेडबृद्धि र आंशिक गरेर ४ लाख ४८ हजार ८३७ विद्यार्थी परीक्षामा सम्मिलित भएका थिए । तीमध्ये १ लाख ८२ हजार ९२६ विद्यार्थीको नतिजा नन ग्रेडेड (एनजी) अर्थात फेल भए । यो संख्या जम्मा विद्यार्थीको ४९.०९ प्रतिशत हुन्छ ।

जुन २०७९ को तुलनामा २.८१ प्रतिशत कम हो । अघिल्लो वर्ष १ लाख ८८ हजार ४१० विद्यार्थीको एनजी आएको थियो । असोज ६ र ७ गते हुने ग्रेड बृद्धि परीक्षामा १ लाख २३ हजार ३९६ विद्यार्थीले ग्रेड बृद्धि परीक्षा दिन पाउनेछन् । एक विषयमा मात्र ७९ हजार ५८४ विद्यार्थीको एनजी आएको छ भने ४३ हजार ८१२ विद्यार्थीको २ विषयमा एनजी आएको छ ।

यी दुवै विषयका विद्यार्थीले ग्रेड बृद्धि परीक्षामा सहभागी हुन पाउनेछन् ।  ५९ हजार ५३० जनाले तीन वा सो भन्दा बढी विषयमा एनजी ल्याएका छन् । उनीहरूले ग्रेड बृद्धिको परीक्षा दिन पाउनेछैनन् । उनीहरूले अर्को वर्षको वार्षिक परीक्षामा सहभागी हुनुपर्नेछ ।

अंग्रेजी विषयको नतिजा कमजोर देखिनुको विभिन्न कारणहरू रहेको बोर्डका अध्यक्ष डा. महाश्रम शर्माको भनाई छ । सबै विद्यार्थीका लागि अंग्रेजी विषय अनिवार्य भएकाले पनि यो संख्या ठूलो देखिएको हुन सक्ने उनको भनाई छ ।   त्यस्तै प्लस टुको हकमा अंग्रेजी विषयमा विद्यार्थीहरूको पढाई नै कमजोर भएको पनि हुनसक्ने उनको भनाई छ ।

‘हाम्रा गाउँघरमा अंग्रेजी भनेपनि निकै गाह्रो लाग्छ । अन्य विषयमा पढ्न मन लाग्ने । तर, अंग्रेजी भनेपनि पहिला नै डराइहाल्ने प्रवृति छ । त्यसले पनि प्रभाव पारेको देखिन्छ । त्यस्तै अंग्रेजी विषय सबैका लागि अनिवार्य भएकाले पनि ठूलो संख्यामा देखिएको हो’ उनले भने ।

अघिल्लो वर्षपनि अंग्रेजी विषयमा नै बढी विद्यार्थीको एनजी आएको थियो । यो वर्ष पनि त्यसमा सुधार हुन नसकेको उनको भनाई छ ।