धार्मिक कथा वाचकका रूपमा उदाएका शास्त्री भारतमा हिन्दु सनातनीमाझ जति लोकप्रिय छन्, उत्तिकै विवादित पनि, उनीमाथि अन्धविश्वास तथा धार्मिक विद्वेष फैलाउने गरेको आरोप लाग्दै आएको छ।
नयाँदिल्ली‚ नवलपुर — धार्मिक विद्वेष र सामाजिक सद्भाव भड्काउने भनेर आरोप लाग्दै आएका भारतीय धर्मगुरुलाई अग्रणी व्यापारिक घराना चौधरी समूहले नेपाल ल्याउन लागेको छ । चौधरी समूहले भारतको मध्य प्रदेशस्थित बागेश्वर धामका संस्थापक धीरेन्द्रकृष्ण शास्त्रीलाई पूर्वी नवलपरासीको दुम्कौलीमा रहेको शाश्वत धाममा ल्याउने भएको हो ।
चौधरी ग्रुप एवं सीजी कर्प ग्लोबलका प्रबन्ध निर्देशक वरुण चौधरीको निमन्त्रणामा शास्त्री आउन लागेका हुन् । शाश्वत धामका व्यवस्थापक अशोक घर्तीका अनुसार शास्त्रीले आगामी भदौ २, ३ र ४ मा कथा वाचन गर्नेछन् । ‘हनुमन्त कथा वाचनका लागि शास्त्रीजी आउँदै हुनुहुन्छ,’ घर्तीले भने, ‘हामी तयारीमा जुटिरहेका छौं ।’ शास्त्री भदौ १ मा नेपाल आएर पशुपतिनाथको दर्शनपछि नवलपुर पुग्ने तयारी छ । उनी कथा वाचन अवधरिभर चौधरी ग्राम परिसरमै बस्नेछन् । उनको कथा वाचन समूह ५० देखि ६० जनासम्मको रहने भनिएको छ । शाश्वत धाम चौधरी समूहको उद्योग ग्राम परिसरमा रहेको छ । त्यहाँ पण्डाल लगाएर कथा वाचनस्थल तयार गरिएको छ । व्यवस्थापक घर्तीका अनुसार एक दिनमा करिब ११ हजार जनाले कथा सुन्न मिल्ने गरेर स्टेज तयार गरिँदै छ । प्रत्यक्ष उपस्थित नहुनेका लागि सामाजिक सञ्जाल तथा डिजिटल डिस्प्लेमार्फत कथा सुन्ने व्यवस्था मिलाइने घर्तीले जानकारी दिए ।
पछिल्ला दिनमा धार्मिक कथा वाचकका रूपमा उदाएका शास्त्री भारतमा हिन्दु सनातनीमाझ जति लोकप्रिय छन्, उत्तिकै विवादित छन् । उनीमाथि अन्धविश्वास तथा धार्मिक विद्वेष फैलाउने गरेको आरोप लाग्दै आएको छ । उनले हिंसा भड्काउने खालका घृणास्पद अभिव्यक्ति दिने गरेका छन् । भारतको हरेक धार्मिक सभामा उनले ‘हिन्दुस्थानमा रहना है तो सीताराम कहना है’ भन्ने गरेका छन् । त्यही कारण शास्त्रीलाई अतिवादी हिन्दुहरूको भने साथ छ । शास्त्रीले भारतलाई हिन्दु राष्ट्र बनाउनुपर्ने सार्वजनिक अभिव्यक्ति दिँदै आएका छन् । सबै हिन्दुलाई एक हुन र धर्म रक्षाका लागि हतियार उठाउन उनले सार्वजनिक अपिल नै गरेका छन् । हिन्दुको घरमाथि पत्थर चलाउनेको घरमाथि बुल्डोजर चलाउनुपर्ने अभिव्यक्ति दिएर उनले खास समुदायविरुद्ध उक्साउने प्रयाससमेत गरेका छन् । आफूलाई कट्टर हिन्दुवादीका रूपमा प्रस्तुत गर्दै आएका उनले मुस्लिम समुदायलाई लक्ष्य गर्दै उनीहरूलाई घर फिर्ता पठाउनुपर्ने बयानसमेत दिएका छन् । शास्त्रीले भूत–प्रेत हुने र त्यसको उपचार आफूले गर्दै आएको भनेर अन्धविश्वास पनि फैलाउने गरेका छन् । उनको सभामा ‘भूत–प्रेतलाई मानिसको शरीरबाट निकालिएका दृश्य’ देखाउने गरिएको छ ।
धार्मिक सहिष्णुता कायम रहेको मुलुकमा यस्ता विवादास्पद व्यक्तिलाई सत्तारूढ कंग्रेसका सांसदसमेत रहेका विनोद चौधरीको समूहले निम्त्याएको हो । मानवशास्त्री सुरेश ढकाल कट्टर धार्मिक मतका प्रवर्तक शास्त्रीले नेपालमा पनि विभाजक र विखण्डनकारी मतको प्रचार गर्ने खतरा रहेको बताउँछन् । उनी यसलाई भारतीय जनता पार्टीको अतिवादी हिन्दुत्वको राजनीति छिमेकमा पनि प्रसार गर्ने बृहत् योजनाको एक अंगका रूपमा टिप्पणी गर्छन् । ‘समाजमा एउटा विभाजक र अर्को संयोजक शक्ति हुन्छ, विभाजकले समाजलाई टुटाउँछ र संयोजक शक्तिले समाजलाई
जोड्छ,’ उनले भने, ‘तोकेरै हिन्दुबाहेक अरूलाई मानिस नगन्ने शास्त्री प्रवृत्ति स्पष्ट रूपले विभाजक शक्ति हो, नेपालजस्तो शान्त र सहिष्णु समाजलाई असर पार्ने गरी यस्ता विवादित व्यक्तिलाई ल्याउनु आपत्तिजनक मात्र होइन, गैरसंवैधानिक पनि छ ।’ उनले शास्त्रीजस्ता अतिवादका प्रवर्तकलाई राज्य र जनता दुवै चनाखो भएर नेपालमा मञ्च दिन नहुनेमा जोड दिए ।
