काठमाडौं, २८ बैशाख। महिलाको अपहरण गरी हत्या गरेको आरोपमा रुकुम पूर्वमा नेकपा (माओवादी केन्द्र)का नेता–कार्यकर्ता पक्राउ परेका छन् ।
पक्राउ पर्नेमा माओवादी केन्द्रबाट वडाध्यक्षका उमेदवार रहेका कुमार सिंह बुढा, पुथाउत्तरगंगा गाउँपालिका वडा नम्बर–११ का वडाध्यक्ष जयकुमार बुढा र अर्जुन बुढालाई पक्राउ गरिएको जिल्ला प्रहरी कार्यालय रुकुम पूर्वले जनाएको छ ।
यही वैशाख १९ गते स्थानीय टक्सेरा गाउँमा निर्वाचन प्रचारप्रसारका क्रममा भएको विवाद मिलाउन पुगेकी स्थानीय ३९ वर्षीया जुङमाया बुढालाई अपहरण गरी हत्या गरेको आरोपमा उनीहरू पक्राउ परेका हुन् ।
पीडित पक्षले दिएको किटानी जाहेरीका आधारमा उनीहरूलाई पक्राउ गरिएको रुकुम पूर्वका डीएसपी प्रकाश डाँगीले जानकारी दिए । ‘‘पीडित पक्षले माओवादीकै नेता–कार्यकर्ताहरुले अपहरण गरी हत्या गरेको आरोप लगाएका थिए । थप अनुसन्धान भइरहेको छ,” उनले भने ।
प्रहरीले टक्सेरादेखि करिब चार किलोमिटरमाथिको जंगलमा बुढाको शव फेला पारेको थियो ।
पुथा उत्तरगंगामा नेकपा (एमाले), नेपाली कांग्रेस र माओवादी केन्द्रका कार्यकर्ताबीच पटक–पटक विवाद र झडप भएको छ । मृतकको शव पोस्टमार्टमका लागि बुटवलस्थित लुम्बिनी प्रादेशिक अस्पतालमा राखिएको छ ।
उक्त गाउँपालिकामा कांग्रेस र एमालेबीच चुनावी तालमेल भएको छ ।
