साउथ सुपरस्टार कमल हासनले ५ वर्षपछि अभिनयमा कमब्याक गरेको एक्सन-थ्रिलर फिल्म ‘विक्रम’ले प्रदर्शनको दुई दिनमा नै विश्व बजारबाट सय करोडको व्यापार गरिसकेको छ । दर्शकबाट उत्कृष्ट प्रतिक्रिया पाएको फिल्ममा कमल हासनसँगै विजय सेथुपति र फहाद फासिलको अभिनय सानदार छ । त्यस्तै, भूमिका छोटै भएपनि अभिनेता सूर्याले आफ्नो प्रभाव छाडेका छन् ।
‘सिंघम’ स्टार सूर्याको फिल्ममा केमियो रोल पृथक छ । फिल्ममा उनको ५ मिनेटको मात्र केमियो रोल छ तर, यसका लागि उनले कडा मेहेनत गरेको देखिन्छ । रोचक कुरा के छ भने उनले यो फिल्ममा अभिनय गर्न पारिश्रमिक लिएका छैनन् । सूर्याले कमल हासनसँग काम गर्ने आफ्नो सपना पूरा भएकोमा खुशी व्यक्त गर्दै फिल्ममा काम गरेबापत पारिश्रमिक नलिएको बताएका छन् ।
‘विक्रम’लाई लोकेश कन्गाराजले निर्देशन गरेका हुन् । राज कमल फिल्म्स् इन्टरनेशनलले निर्माण गरेको यो फिल्ममा कालिदास जयाराम, नारायण र अर्जुन दासको पनि अभिनय छ । फिल्मको डाइलग रतना कुमार र लोकेशले मिलेर लेखेका हुन् । पछिल्लो समय राजनीतिमा सक्रिय रहेका कमल हासन ‘विक्रम’मा एक्सन अवतारमा प्रस्तुत छन्, जसमा उनी जबर्जस्त देखिएका छन् ।
